Pages

السبت، 13 نوفمبر 2010

عايزة أحلم



أجمل شئ فى الدنيا الأحلام
زمان وأنا صغيرة كنت لما بتفرج على أى فيلم أجنبى
كنت بتخيل نفسى مكان البطلة
وأفضل طول الليل أحلم بالبطل اللى هيجى ينقذنى
حاولت اعمل كده امبارح
حاولت أتخيل نفسى مكان البطلة وأحب البطل
بس مقدرتش حسيت أن الموضوع صعب أوى
ازاى هحلم بغيره , وهو كان كل أحلامى
مابقتش قادرة اتخيل فارس لأحلامى غيره
لقيت نفسى بدل ما أحلم ببكرة وأنا مبتسمة وسعيدة
بقيت بفكر فى امبارح وأنا بعيط وبقول ليه دا كله حصل
وأسخف شئ أنى مبقتش قادرة أحلم تانى
حاسة أن عقلى اتجمد عند مرحلة معينة من الاحلام
بقيت بخاف أحلم , بخاف الحلم يتحقق أو افتكر انه اتحقق
وفجأة كالعادة يختفى ويدوب وياخد عمرى معاه
بقيت بخاف ادخل الدوامة تانى ( دوامة الأحلام )
كان ممكن اسامحه على أى حاجة عملها
ممكن اسامحه على وعوده اللى منفذهاش
ممكن اسامحه على استهتاره بيا
ممكن اسامحه على كدبه وخداعه
بس مستحيل اسامحه على أحلامى
أحلامى اللى اتحولت لمجرد ذكريات
وحشتنى أوى روايات عبير
والبطل اللى لازم يتجوز البطلة
وحشنى فارس أحلامى

هناك 10 تعليقات:

Dr/ walaa salah يقول...

ياااه حتى الأحلام بقينا نخاف منها

اصعب حاجه انهم يخلونا نكره احلامنا بسببهم

الاحلام كانت بالنسبه لينا الملجأ الوحيد اللي كنا بنهرب من الواقع ليها

دلوقتي مفيش قدامنا غير الواقع ثم الواقع

ربنا يرحمنا برحمته


كلماتك جميله كالعاده يا اسماء


مشكوره يا حبيبتي على البوست الجميل

Unknown يقول...

الكلمات جميلة بجد.. حسيتها قوي..

يمكن بسبب الخبرة السابقة.. الله أعلم!!

بصراحة مش عارف ليه أثناء قراءة كلماتك ألح على ذاكرتي بوست كنت كتبته من فترة.. ممكن تقرأيه إذا حبيتي:

http://magidalkady.blogspot.com/2010/08/13.html

ربنا يجعل أيامك القادمة سعادة وهناء.. وكل عام وأنت بخير بمناسبة عيد الأضحى المبارك..
تحياتي أختي الكريمة.

We$aM يقول...

حقيقي أجمل شيء في الدنيا الأحلام

ورأيي إن بدون أحلام تبقى الدنيا جحيم

أحياناً بالأحلام نقدر نخرج من الواقع المر وأحياناً نعيش جواه ومع الأحلام ما نشعرشي بيه

أشكرك يا أسماء على الأحلام الجميلة

mero moonlight يقول...

الله عليكى يا سوسو
هو ده الكلام لانك من حقك تحلمى ببكره و بشريك لحياتك و لايامك اللى جايه
و يا رب يوفقك و تلاقى احلى شريك
و اكيد مش اى حد لانك مش هترضى بأى حد
ده انتى سومه حبيبتى

دروع تذكاريه للمدارس للملتقيات للمراكز الصيفيه يقول...

فكرتينى بيا يااسماء فعلا مبقتش عرفه احلم بس لازم نحاول تانى وننسى القديم ونحاول نحلم دى ابسط حقوقنا فمجتمع مداناش اى حقوق غير الاحلام مش من حق اى حد يمنعنا منها

بوسي يقول...

انسى الماضى لانو مش هيعمل حاجة
غير انو هينكد عليكي تعيشى مستقبلك
وانسى اى انسان ميستاهلش
يمكن ربنا بعدو علشان يجي الى يستاهلك
تسلم ايدك

Asmaa Amer يقول...

ميرسى ليكم كلكم
الاحلام فعلا اهم حاجة
الانسان اللى مايقدرش يحلم أكيد انسان ميت

Asmaa Amer يقول...

البوست اللى حضرتك حطيت لينكه يا أستاذ ماجد
جميل جدا

غير معرف يقول...

احلمى بالحضار احلمى بالمستقبل مش بالماضى
الماضى مهما حلمت بيه ماضى مش حاضر
ويارب تحلمى احلام سعيده
وبجد اسلوبك جميل اوى ياستار

Asmaa Amer يقول...

بس الماضي هو نواة الحاضر والمستقبل
أنا عارفة أن الماضي شئ حصل وانتهي
بس الهدف من الأحلام أنها تحول اللا معقول لمعقول
الأحلام مش مرتبطة بجدول زمني
دي مرتبطة بأهدافنا ورغباتنا في تحقيق الأهداف دي