Pages

الجمعة، 13 مايو 2011

أنا قبطي أنا مضطَهَد. بس مش قوي


الموضوع دا مش موضوعى دا موضوع طالب مسيحي كتبه على الفايس بوك وعجبنى جدا, وحبيت انكم تقروه

أنا روّحت من الكلية في تاكسي امبارح

آه ده يُعتبَر خبر. أصل لو عملتها كل يوم اسبوعين ونبات أنا وأهلي في الشارع

أمال إيه اللي حصل؟

أصل كان معايا ناس. كنا خمسة سوا في التاكسي

برضو مش دي الحكاية

الحكاية إن أنا اسمي افرايم. وأبويا قسيس. ومن السبت اللي فات قلبي واجعني على كنيستي اللي اتحرقت واخواتي اللي ماتوا في امبابة

الأقباط مضطهدين

إيه ده يعني أنا شخصياً مضطهد؟

فيسبوك والنشرة والجرايد والتوك شو بيقولوا كده

أمال أنا مش حاسسها قوي ليه؟

السبت بالليل نادين محمد بعتت لي: أنا مش قادرة اوقف دموعي

يوم الاتنين اسماعيل قال لي: أنا مش هاواسيك حتى. هما يومين سود علينا كلنا لازم هانستحملهم

ويومها يوسف البرغوتي أول ما دخل على الشات كتب لي: البقية في حياتك

وامبارح؟ كنا في التاكسي أنا ومنعم ومنتصر واسماعيل وابراهيم

منعم مربي دقنه ونفسه نطبق الشريعة. ابراهيم صوفي. اسماعيل ومنتصر مسلمين عاديين. أنا مسيحي وليبرالي اعشق العلمانية

وكلنا كنا راكبين سوا

كل واحد فينا لوحده ماكانش هايقدر يركب تاكسي

بس لما اتفقنا نخمس سوا المشكلة اتحلت. ووصلنا

وساعة ما قلنا نخمس محدش جه قال لي: تعالى اركب معانا عشان قصر العيني فيه وحدة وطنية. ولا حد قال لي انت مسيحي وأنا مسلم زيي زيك العداد عليّ وعليك. محدش قال الدين لله والتاكسي للجميع

كل اللي جه على بالنا ساعتها إن كلنا تعبانبن وكلنا سكّتنا طويلة وكلنا عايزين نوصل بقى وكل واحد فينا لوحده معندوش الإمكانيات اللي توصله

بس مع بعض وصلنا

آه كنا مزنوقين في التاكسي - ماعدا منعم فلت وركب قدام. بجد عمري ما ها آمن لواحد بدقن

وآه الطريق كان زحمة. بس شوية ونسينا دي ودي وسط الكلام والهزار

و عشان مع بعض كل واحد كان مطمن إن عجزه في غيره ها يسده له

ببساطة كده

سيبك من ليلة مسلم مسيحي إيد واحدة وعاش الهلال مع الصليب (مع الأسف) وكليبات البابا شنودة بيبوس الشيخ الطيب

سيبك حتى من كلمة "وحدة وطنية" - محدش بيقول: مصر فيها وحدة مترية الطويل والقصير طول عمرهم عايشين اخوات ومتربيين مع بعض

فاهمين قصدي؟

الحوار دلوقتي إن كلنا مصريين و كلنا تعبانبن وكلنا سكّتنا طويلة وكلنا عايزين نوصل بقى وكل واحد فينا لوحده معندوش الإمكانيات اللي توصله

بس مع بعض لسه في أمل نوصل

ملحوظة: في الآخر ماكانش معايا فكة ونزلت من غير ما ادفع حاجة - باين الأقباط خونة بجد

المصري: افرايم القس بنيامين Evra Morgan

هناك 4 تعليقات:

محمد محمود عمارة يقول...

افرايم صراحة لخص الموضوع بخفة دم ، و أنا بحب الأسلوب ده في الكتابة انك توصل موضوع جدي للقارئ فيقراه و الابتسامة مش قادرة تسيب شفايفة . شكرا استاذة اسماء

د/دودى يقول...

فى الظلم و الغلاء و الموت و القهر لم يفصل احد طرف عن طرف فاحنا الاتنين شايلين الهم العمر كله...

محمد الجرايحى يقول...

شكراً لك أسماء
لنقلك هذا الموضوع الذى يأتى من واقع نريد أن نراه
ويراه الجميع ..لعل وعسى
جزاك الله خيراً

nesma hatem يقول...

الموضوع رائع
:)