عينى عليا يا عينى عليابيعى يا دنيا واشترى فيا
نفسى الدنيا تنسانى شوية
اية يا دنيا مالك ؟؟؟؟؟؟؟؟
مفيش وراكى غيرى
كل ما احس انك خلاص هتضحكيلي
تطلعى فى الاخر بتضحكى عليا
لية عايزة تهدمينى , لية مصممة تكسرينى
حرام عليكى مش كفاية دموع سنينى
بتخرجينى من جرح لجرح
وعمالة تخبطى فيا
افتكرت نفسى هقدر اقف قدامك
كان لازم اسمع كلامك , معلش طلعت غبية
لما سرقتى منى روحى , ما كانش لازم امسك فيها
لما سرقتى منى فرحتى , ماكانش لازم اعيط عليها
لما انتى عايزة تموتينى , خلتينى لية من الاول اعيش
ما الفرص كانت كتير قدامك , دا انتى يا دنيا ماتسويش
انتى اللى ضيعتيهم , ودلوقتى بتلومينى
لو عايزة تموتينى , موتينى وخلصينى
لو عايزة من تانى تجرحينى
جهزى سكاكينك وريحينى
لو عايزة تقفى معاهم ضدى
اقفى , من امتى وانتى بتحبينى ؟
لو عايزة كمان تريحيهم
وماله , ريحيهم واتعبينى
لو عايزانى انسى روحى
هنساها , بس اوعى انتى تفتكرينى
هناك 8 تعليقات:
السلام عليكم اسماء
جميل جداً جداً ما كتبتيه ودعيني احيكي بصدق عن تلك الدفقات الرائعة من المشاعر
فالدنيا بالفعل يا اسماء اصبحت صعبة وتفاجئنا كل يوم بما يصدمنا ويجعلنا نلعن حظنا علي المجئ اليها وتجعلنا نتمني ان نموت في اليوم اكثر من الف مرة
انها تسحقنا كل يوم بما تفعله
مع اعز ناس لنا
مع من احبنناهم يوماً
مع من كنا نتصور انهم اصدقاء لنا
هي تريدنا ان نموت كمداًوان ننسي تلك المشاعر الرقيقة الكامنة لدينا والتي اصبحت لا تخرج مننا لاننا اصبحنا قساة جداً جداً
فيليتنا متنا قبل ان نري ذلك منها وكما قلتي فلتقتلينا ايتها الدنيا وتريحنا من ذلك العذاب
ميرسي جداًَ لكلامك يا اسماء
أحمد
كلمات رقيقه وجميله جدا وموجعه بجد
جيتى على الجرح
بجد تسلم ايدك على هذه المشاعر الرقيقه اللوامه الجميله
تقبلى مرورى
تحياتى
تسلمى يا اسماء على الكلام الجميل دا انتى بتعبرى بيه عن ناس كتير
بس الدنيا مضحكتش عليكى لوحدك وادينا عايشين
شكرا على تشجيعكم يا جماعة
هى فعلا الدنيا كده مش بتقف عند حد
عاملة زى الدوامة لو دخلت فيها عمرك ما هتعرف تخرج منها
أولا.. الكلمات جميلة بجد.. بس هعتبرها كلمات طريفة من واحدة بتناغش الدنيا.. لأن لو حطيت بعض الكلمات في سياقها الحقيقي بالإضافة إلى الصورة (المرعبة!) سأستنتج أن صاحبة البوست غالبا الآن تتأرجح من حبل في منتصف غرفتها....(!)
حاولي إعطاء الدنيا وضعها الطبيعي وقيمتها الحقيقية، فكثير من الأمور ما هي إلا نتاج ما صنعت أيدينا وليس للظروف دخل فيها.. ولهذا يحاسبنا الله..
لو ظللنا نتحدث بلهجة الشهيد (وكلنا بلا استثناء يتقنها) لما استطعنا تغيير شيء في حياتنا..
اخرجي أختي الكريمة من شعورك بالعجز تجاه الدنيا.. اعتركي معها وعاركيها... وستجدين والله أنها أهون بكثير مما ترين، وستكتشفين أنك قادرة على فعل الكثير مما لم تتوقعي...
هل أعطيتُ الموضوع أكبر من حقه؟! ربما.. ولكن كان من الممكن أن أقول أن كلماتك ما هي إلا مجرد خواطر أدبية.. لولا...... أنني وجدت أن هذه الروح الانهزامية تجاه الدنيا (القوية الرهيبة التي تتحكم في حياتنا من ألفها إلى يائها!) تسيطر على معظم كتاباتك..
عامة هي نصيحة مخلصة والله، يمكنك قبولها أو بسهولة تعملي.......Delete :)
دمتِ سالمة أختي الكريمة.
عارف يا أستاذ ماجد المشكلة مش في الدنيا نفسها ،المشكلة في الناس .
أصعب حاجة في الوجود أن تعيش علي أمل الوصول لهدف معين وبعد معاناة طويلة خلاص قربت توصل وفجأة كل حاجة تضيع .
دا بيولد إحساس فظيع بالعجز واليأس وضعف الحيلة .
تخيل بقي لو الإحساس دا فضل ملازمك 4 أو 5 سنين وقتها هتحس أن وجودك علي الأرض ما يفرقش كتير عن وجودك تحتها
عندك حق لما تحلمى بحاجه سنين و تضيع
احساااااااااااااااس فظيع اوى
إرسال تعليق