Pages

السبت، 2 أبريل 2011

عريس أخر زمن

مش هتصدقوا

امبارح جالى عريس
( طبعا أنتم عارفيين العريس فى زمننا دا يعنى اية ؟)
والعريس كان لقطة وفيه كل المواصفات اللى تتمناها أى بنت
مهندس و غنى (بصراحة معندوش عربية بس ناوى يجيبها قريب )
وطويل وأبيض وعينه خضراء وشعره أصفر
من الآخر كده مفيهوش غلطة
لما جه عندنا كان هادى وخجول بس كان بيبص من تحت لتحت
(طبعا البنات كلها عارفة النظرة دى)
عدت أول 5 دقايق وهو ساكت ومامته هى اللى بتتكلم - قلت معلش يمكن بيتكسف
وبعد أول خمس دقايق بدأ ينطق ويتكلم - قلت الحمد لله أخيرا فرجت
وبعد 5 دقايق تانية قعد وحط رجل على رجل فى وشى - مش مشكلة أهو هيبقى جوزى
شوية وطلب حلبة ( أصله مابيحبش الساقع )- مافيهاش حاجة اعتبرنا زى أهله
ومع الحلبة كان بياكل الجاتوه (بايديه الاتنين)- قلت عادى خليه على طبيعته
طلع معندوش شقة ومش معاه فلوس يشترى - قلت وماله عش العصفورة يكفينا
قال أن الذهب غالى ومن السفه أننا نضيع فلوسنا عليه - ما شاء الله الراجل مدبر
قالى انه اتجوز قبل كده مرتين (دا غير اللى كان مصاحبهم )- الواد طلع خبرة
قالى انه دخل السجن مرة فى حادثة تحرش - قلت ياما فى الحبس مظاليم
قالى أنه ساب الشغل وأن ابوه اللى هيسرف علينا - يا سلام فعلا أسرة مترابطة
قالى أنه ناوى يتجوز عليا بعد شهر العسل على طول - الواد وطنى وبيحل أزمة العنوسة
بعد شوية مسك ايدى وقالى أنتى اللى بحلم بيها - قولتله الله عليك يا سيدى
وفجأة جاله تليفون خاص شوية ( دخل اوضة النوم علشام يرد )- قلت خلاص البيت بيته
تعب شوية من الوقفة وهو بيتكلم قعد وريح على السرير-عادى يا جماعة الراجل تعبان ولازم يستريح
وخلص مكالمته ورجع وأنا بتأمله وبفكر فى اللى حصل
لقيت كل دى حاجات عادية وتافهة ومش لازم نقف عندها
كله يهون فى سبيل عنيه الخضراء وشعره الأصفر
وفجأة لمحته وهو بيدخله فى جيبه , شفته بعيني
الناس تقول عليا اية ؟
هبص لنفسى ازاى فى المراية بعد كده
دى كارثة بكل ما تحتويه الكلمة من معانى
موبايله طلع موتوريلا ( أبو اريل ) , وأنا بتاعى نوكيا e66
يعنى صعب نتفاهم , طلع مش من قاعدتى الفكرية
مش معقول , أنا أسماء على أخر الزمن أبقى مرات أبو اريل
وللأسف رفضته مع أن والله الواد ماكنش يتعيب

هناك 11 تعليقًا:

Unknown يقول...

غلطاااااااااااااانة يااسماء الواد ماكنش يتعيب

princess farah يقول...

بصراحة رائعة ياسـمسمة
فعلا هو مافيهوش عيب هههههههههههه
هو بس لو غير موبايله ابو اريل ده
بس انتي غلطانة قبل ماترفضيه كنتي تعرفيه ان فيه جهاز احدث شويه من موبايله اسمه بلاك بيري ههههههه

Asmaa Amer يقول...

أنا بعد كده لما يجيلى عريس هعمله تفتيش ذاتى
لازم أشوف كل حاجة معاه
مين عارف المرة الجاية هيكون معاه اية ؟

غير معرف يقول...

ياللى تنقرصى يا جزمة طيب انتى رفضيتيه حوليه عليا على طول واناراضيه

Asmaa Amer يقول...

يخرب عقلك هو أنتى لسه عايشة ؟؟؟؟
بغض النظر على الشتيمة والأسلوب المبتذل
من عنيا حاضر لما يجيلى أى عريس بعد كده هعديه عليكى الأول

Unknown يقول...

طب انا ماشى بتليفون البيت ابو سلك بس من غير اريل انفع ابقا عريس :))))

غير معرف يقول...

ده حقيقي بجد يا استاذه؟؟؟؟؟؟؟؟

Emtiaz Zourob يقول...

طبعا لازم ترفضيه ،، هزولت .. إلا الموبايل !! شو هالاستهتار اللي هو فيه .. لالالالا كويس انك رفضيته ، صحيح هو مايتعيبش خالص ، بس إلا الموبايل ..

سعدت بتواجدي لاول مرة ...
تقبلي خالص تحيتي وتقديري.

Asmaa Amer يقول...

وجع البنفسج
أهلا بيكى فى المدونة وعلى الفايس , أنا اشرفت بمعرفتك واتمنى ماتكونش دى آخر مرة
على فكرة اسمك جميل أوى

Asmaa Amer يقول...

غير معرف
هو الموضوع نصه حقيقى ونصه مبالغة
واكيد انا مش هرفض عريس لقطة زى دا علشان الموبايل
ولا إية ؟؟؟؟؟؟

غير معرف يقول...

صراحة أنا لما قريت أنه طلب حلبة عرفت إنه مينفعكيش خالص . مشكلة الموبايل تهون ، ممكن يستخدم موبايلك ، لكن مشكلة الحلبة مش ممكن ...ياما ناس متوفقتش في حياتها بسببه و ربنا يسترنا كلنا.