Pages

الاثنين، 18 أبريل 2011

صلاح جاهين – ابن الشعب الضاحك


أنا اترددت كتير أوى قبل ما نشر البوست دا , بس بتمنى أنه يعجبكم
أنا اخترت الوقت دا علشان انشره لأن ذكرى وفاته خلاص قربت
انا حبيت اعرضلكم نيذة عن حياة الشاعر صلاح جاهين
ومجموعة من أهم قصايده (او بمعنى اصح القصائد اللى أنا بحبهاله أوى )

محمد صلاح الدين بهجت أحمد حلمي، المشهور بـصلاح جاهين

(25 ديسمبر 1930 - 21 إبريل 1986 م) شاعر ورسام وممثل مصرى يساري الفكر.

ولد في شارع جميل باشا في شبرا. كان والده المستشار بهجت حلمي يعمل في السلك القضائي

درس الفنون الجميلة ولكنه لم يكملها حيث درس الحقوق.

و من قصائدة المميزة قصيدة على اسم مصر وأيضا قصيدة تراب دخا

ن اللتى الفها بمناسبة نكسة يونيو 1967. وكان مؤلف أوبريت الليلة الكبيرة أشهر أوبريت للعرائس في مصر.

كما أرتبط بعلاقة قوية مع الفنانة سعاد حسنى

تفوق صلاح جاهين على نفسه في مجال رسم الكاريكاتير حيث كان كاريكاتير صلاح جاهين أقوى من أي مقال صحفى

ولم يستطع أحد ملء هذا الفراغ حتى اليوم بنفس مستوى جاهين الذي يتميز بخفة الدم المصرية الخالصة.

وللمزيد دا لينك الموقع الرسمى لصلاح جاهين :

موقع صلاح جاهين

الدنيا أوده كـــــــبيره للانتظار

فيها ابن أدم زيه زي الحـــمار

الهم واحد .. و الملل مشـترك

و مفيش حمار بيحاول الانتـحار

عجبي !!

* * * * * * * * * *

أيوب رماه البين بكل العــلل

سبع سنين مرضان وعنده شلل

الصــبر طيب .. صبر أيوب شفاه

بس الأكـــــاده مات بفعل الملل

عجبي !!!

* * * * * * * * * *

يا طير يا عالي فى الســما طظ فيك

ما تفتكرشي ربنا مصطـــــفيك

برضــــك بتاكل دود و للطين تعًًًًودً

تمـــص فيه يا حــلو .. و يمص فيك

عجبي !!!

* * * * * * * * *

كروان جريح مضروب شعاع م القمر

سقط من السموات فؤاده انكســـر

جريت عليه قطه علشان تبلعـــه

أتاريه خيال شعراء و مالهــوش أثر

عجبى !!!

* * * * * * * * *

يا باب يا مقفول ... إمتى الدخول

صبرت ياما و اللي يصبر ينول

دقيت سنين ... و الرد يرجع لي : مين ؟

لو كنت عارف مين أنا كنت أقول

عجبي !!!

* * * * * * * * *

خرج ابن آدم من العدم قلت : ياه

رجع ابن آدم للعدم قلت : ياه

تراب بيحيا ... وحي بيصير تراب

الأصل هو الموت و لا الحياه ؟

عجبي !!!

* * * * * * * * *

إنسان أيا إنسان ما أجهلك

ما أتفهك في الكون و ما أضألك

شمس وقمر و سدوم و ملايين نجوم

و فاكرها يا موهوم مخلوقه لك

عجبى !!!

* * * * * * * * *

ضريح رخام فيه السعيد اندفن

و حفره فيها الشريد من غير كفن

مريت عليهم .. قلت يا للعجب

لاتنين ريحتهم لها نفس العفن

عجبي !!!

* * * * * * * * *

ياما صادفت صحاب و ما صاحبتهمش

و كاسات خمور و شراب و ما شربتهمش

أندم علي الفرص اللي انا سبتهم

و الا علي الفرص اللي ما سبتهمش

عجبي !!!

* * * * * * * * *

سهير ليالي و ياما لفيت و طفت

و ف ليه راجع في الضلام قمت شفت

الخوف ... كأنه كلب سد الطريق

و كنت عاوز أقتله .. بس خفت

عجبي !!!

* * * * * * * * *

أنا شاب لكن عمري ألف عام

وحيد لكن بين ضلوعي زحام

خايف و لكن خوفي مني أنا

أخرس و لكن قلبي مليان كلام

عجبي !!!!

* * * * * * * * *

عجبتني كلمة من كلام الورق

النور شرق من بين حروفها و برق

حبيت أشيلها ف قلبي .. قالت حرام

ده أنا كل قلب دخلت فيه اتحرق

عجبى !!!

* * * * * * * * *

ورا كل شباك ألف عين مفتوحين

و انا وانتي ماشيين يا غرامي الحزين

لو التصقنا نموت بضربة حجر

و لو افترقنا نموت متحسرين

عجبي !!!

* * * * * * * * *

نوح راح لحاله والطوفان استمر

مركبنا تايهه ولسه مش لاقيه بر

اه م الطوفان واهين عليك يا بر

ازاي تقدر تبان والدنيا غرقانه شر

عجبي !!!

* * * * * * * *

ينبوع و في الحواديت أنا سمعت عنه

إنه عجيب .. وفوسط لهاليب لكنه

شقيت كما الفرسان طريقي .. لقيت

حتي الخنازير و الكلاب شربوا منه

عجبي !!!!

* * * * * * * * *

شاف الطبيب جرحي وصف له الأمل

وعطاني منه مقام يا دوب ما اندمل

مجروح جديد يا طبيب و جرحي لهيب

ودواك فرغ مني .... و إيه العمل

عجبي !!!

* * * * * * * * *

إيش تطلبي يا نفس فوق كل ده

حظك بيضحك و انتي متنكده

ردت قالت لي النفس : قول للبشر

ما يبصوليش بعيون حزينة كده

عجبي !!

* * * * * * * * *

الفيلسوف قاعد يفكر سيبوه

لا تعملوه سلطان و لا تصلبوه

ما تعرفوش إن الفلاسفه يا هوه

اللي يقولوه بيرجعوا يكدبوه

عجبي !!!

* * * * * * * * *

السم لو كان في الدوا منين يضر ؟

و الموت لوعدونا .. منين يسر؟

حط القلم في الحبر و اكتب كمان

.. و العبد للشهوات .. منين هو حر؟

عجبي !!!

* * * * * * * * *

إقلع غماك يا تور وارفض تلف

إكسر تروس الساقية و اشتم وتف

قال : بس خطوة كمان .. وخطوة كمان

يا اوصل نهاية السكة يا البير تجف

عجبي !!!

* * * * * * * * * *

سمعت نقطة ميه جوه المحيـط

بتقول لنقطه ما تنزليش في الغويط

أخاف عليكي م الغرق .. قلت أنا

ده اللي يخاف م الوعد يبقي عبيط

عجبي !!!

* * * * * * * * *

كرباج سعاده وقلبي منه انجلد

رمح كأنه حصان و لف البلد

و رجع لي نص الليل و سألني .. ليه

خجلان تقول انك سعيد يا ولد

عجبي !!!

* * * * * * * * * * * * *

على اسم مصر التاريخ يقدر يقول ما شاء

أنا مصر عندي أحب وأجمل الأشياء

بحبها وهي مالكة الأرض شرق وغرب

وبحبها وهي مرمية جريحة حرب

بحبها بعنف وبرقة وعلى استحياء

واكرهها وألعن أبوها بعشق زي الداء

واسيبها واطفش في درب وتبقى هي ف درب

وتلتفت تلاقيني جنبها في الكرب

والنبض ينفض عروقي بألف نغمة وضرب

اتمنى ماكونش طولت عليكم ويكون الموضوع عجبكم

هناك 5 تعليقات:

مرايتى يقول...

الله يرحمه بجد عبقرى

تسلمى ياقمر على الموضوع

غير معرف يقول...

الأستاذة الفاضلة أسماء
أحلى ما في الموضوع انك عرضتي لنا بعضاً من أشعار جاهين.
و بعدين أحب أوضح إن جاهين كان يساري يعني بياكل بإيده الشمال ( بهزر طبعا )

د/دودى يقول...

إنسان أيا إنسان ما أجهلك

ما أتفهك في الكون و ما أضألك

شمس وقمر و سدوم و ملايين نجوم

و فاكرها يا موهوم مخلوقه لك

عجبى !!!

رباعيتى المفضله .....

مدونتك لونها مريحه و لذيذه ..تقبلنى فى زيارتى الاولى و لن تكون الاخيره

الجوكر يقول...

لكِ ذائقه غذبة

وإختيار رائع

جاء فى موعده

رحم الله شاعرنا القدير وطيب ثراه

مودتى

faroukfahmy يقول...

برافو عليكىيا اسماء
صلاح جاهين مات واحنا مش عايشيــــــن
ايه قيمة العيش من غير رغيف العيـــش
خدنا على الفقر ومن غيره مانقدر نعيش
خايف على الهوا يمكن يقولوا مافيــــش
وسعره يبقى غالى ونروح مانجيــــــــش
(فاروق فهمى)